Autosatira: first world problems

Sco mincha bunura suna statta sü eir hoz. Che’m resta eir oter? Sco adüna as drivan meis ögls a las 5:55.  Che bodezzas! Il sulai nun es amo gnanca sü, perche n’haj’eu lura da star sü usche bod?

E lura adüna l’istess teater mincha bunura. Far la duscha, lavar ils daints, mangiar culazchun,  (na in quella successiun, s’inclegia). E lura quist trar aint! Fingià a bunura bod esa da cumanzar culs stüdis:

Che di esa? Nö sonda, es pel solit la resposta. Guat, lura esa da trar aint alch inandret, schi’s va tanter la glieud. (Quai voul dir, ingünas chotschas da trainer e neir na quel pulloverun gross e flauschig)

Lura, co es l’ora? Esa fraid o chod? Plövgia, naiv, orcans, tsunamis, va hoz suot il muond? Pel solit as decida inamöd adüna da trar aint la fossa roba; il t-shirt fin cur chi vegn la prüma naiv ed il pullover da lana cur chi’s tira sü la tschiera ed il sulai arda giò dal tschêl sco sch’el nu vess nügl’oter da far.

Eu manaj, i dà blera glieud chi nun ha da quists problems. Per exaimpel schi nu’s ha nüglia da trar aint, lura nu’s haja da respuonder mincha bunura quistas dumondas da tour e mütschir.  O schi’s ha oramai be ün pêra chotschas, lura as tira simplamaing aint adüna quellas! E l’istess culla culazchun. Che dessa mangiar, jogurts da mocca o da frajas? Müesli? Il plü simpel füssa, da na mangiar nüglia. O chi’s va a rovar e’s surlascha la decisiun davart la nudritüra a nos chars conumans.

I pudess tuot esser uschè simpel!

Eir schi nu’s stuvess ir a scoula. Prüma vessna spargnà dudesch ons da rumper la testa pervi d’equaziuns matematicas e vocablas spagnölas. E dafatta l’ambiaint profitess dal na ir a scoula. I’s spargness il benzin pel auto da posta chi spüzulentescha mincha bunura tuot la vallada, la forz’elettrica e l’öla pel s-chodamaint eui. E lura, il stadi! Sch’el nu vess da sustgnair las scoulas cun raps da qua e da là, lura restessan bler daplüs raps per otra roba. Na chi’m gniss uossa adimaint alch, ma i’s  chattess schon üna soluziun. Guerra per exaimpel. Ir a bombardar ün pa l’IS o uschè. Investir in nos futur.

I’s pudess jo far pitschens pass. Per exaimpel as pudessa cumanzar cun serrar l’IOF. Lura nu gniss forsa ingüna glieud estra a star in Engiadina, pervi cha’ls uffants da quels nu vessan üna scolaziun bun’avuonda e no vessan nos pos. Lura, forsa insacura, nu gnissan neir ingüns turists plü! Che bellezza cha quai füss…

E lura pudessan nus Engiadinaisins, chi vivan inamöd „davo la glüna“ (definiziun d’ün Engiadinais chi’d es emigrà illa Bassa e dvantà ün dad els), darcheu viver in pasch e gnir ignorats dal rest dal muond. Nix Graubünden Tourismus e Gian e Giatschen – darcheu üna jada back to the roots (Sa inchün perche ch’eu douvr quist term talmaing suvent in meis blogs?) e nan cull’agricultura.

Perche eschan nus dvantats talmaing umbras? No lain adüna daplü, megldra scolaziun, meglder manster, carriera grondiusa e blers raps per cumprar adüna il plü nouv iPhone. Ed invezza saran noss antenats eir stats cuntaints. Guat, las guerras mundialas as vessa pudü laschar davent, ma inschnà?

Eu nu sun daltuot sgüra ingio ch’eu laiva ir a finir cun quist blog, ma eu craj ch’eu saja rivada in ün oter lö co previs. Mo bain, oramai til hast listess let. ¯\_(ツ)_/¯