La dretta vart schnestra

Sül viadi tanter Scuol-Tarasp e Cuoira daja be üna vart per sezzer giò aint il tren. La vart schnestra in direcziun dal viadi.

Da Cuoira a Scuol-Tarasp es quai invezza tschella vart schnestra. (Eir nomnada la vart dretta, cun quai chi’d es la dretta vart.)

Quista regla es universala e vala per minchün. Independent da l’orientaziun politica e dal man da scriver preferi.

Be psicopats sezzan da la fossa vart schnestra.

Quai nun es amo documentà scientificamaing, ma ils condictörs pudessan sgüra confermar, cha’ls passagiers chi sezzan da la dretta vart schnestra sun bler plü agreabels sco tschels.

Forsa ha quai simplamaing eir dachefar culla bella vista cha tals viandants giodan sezzond illa dretta vart dal vagun.

Els vezzan nempe las muntognas da l’Engiadina apaina chi’s riva our dal Vereina, invezza dals autos chi spettan per chargiar.

Els vezzan ils duos allevamaints da tschiervis i’l partens.

Els vezzan il chastè da Tarasp e la punt da Vulpera invezza da las costas stippas da Ftan.

Minchün chi ha fat fingià üna jada quel viadi culla viafier retica, sa da che cha nus discurrin qua.

Ils unics na-psicopats chi sezzan eir da la fossa vart schnestra, sun ils turists chi rivan pella prüma jada in Engiadina. A quels as poja perdunar quel sbagl cardinal, causa chi saran massa preocuppats cun valischs e buschas e skis e s-charpas da muntogna per s’infuormar i’l Knigge da la RHB sur da’ls üsits e las tradiziuns.

Ma uei schi crajan da repetter quel sbagl, lura daja taifels!