Students. I para chi detta be duos sorts; nempe quels chi nun han mai temp, sun tuotta pezza vi dal imprender, e paran da cumbatter cun mantunadas da prelecziuns e preschentaziuns e documentamainta da qua e da là.
E lura daja quels chi chillan la vita, van tenor vöglia in prelecziuns, chaminan intuorn in chotschas da trainer e passaintan las nots festagiond cun lur collegas.
Quai chi tils definescha sco students, il trat caracteristic da la famiglia, es la mancanza da raps. Students nun han raps per nüglia, disch la legenda. Ed implü han ils blers individis rinchs intuorn il ögls chi svanischan pür ons davo avair fini il stüdi.
Cun quai cha quist sun las unicas infuormaziuns ch’eu n’ha pudü ramassar fin uossa, n’haja decis da frequentar svessa ün stüdi per perscruttar plü profuondamaing quista spezcha d’umans.
Eu nu sa che chi’m spetta. Forsa scuverna nouvas spezchas da students, forsa daja cruschaders tanter il tip chillà ed il tip stressà. Forsa sun quellas sorts periclittadas o fingià mortas oura. In mincha cas am metta a disposiziun sco scuvridra e rapportarà a partir da la mità da settember à la Andreas Moser live da l’università da Turich, ingio cha la densità da students cun ragischs rumantschas para d’esser relativmaing ota.
Fin là, sta bain.
ElBerndo scriva 